Evro, dihî, evro
BEROJ AKREY
Qasid hat û kaxezek îna
Me kaxez nexwend, qasidî got:
Dihî kuştin
Hemî kuştin
Pişta me çemya
Wek wê kaxeza me nexwendî
û li ser mêzê ketibû
û pişt lê çemyabû.
Parzînkek bi pişta çavên me ve
Pişt li çiyayan
sîng li hetavê.
Dinya pîr bû
çiya pîr nebûn
Belgêt destên me weriyan
Tiryê rezê van çavêt me
bûne mewîj
Destek nehat me perjan bike?
Ser bû şikefta
per û dirêşînkêt mêş û zirkêtkan
Berî Xwedê bibîte Xwedê
Heta evro tên û dicing
Hindek carjî
di pencera çavêt me re
sehdikin vê dinyayê
berê xwe didete kelehata serê
wendabûyî
ku evroke yêt bûyne DIMDIM
Çiya pîr bûn
Dimdim pîr nebû
Dest sefer û
ser sefer û
pê sefer û
diljî sefer.
Ziman koçer û
çav koçer û
guh koçer û
difin koçer.
Dimdim raza
Em ranezan
Her mirîn û şîn bûyneve
her şînbûyn û zivrîneve
her bezîn û ber bi meytê
xwe yê dihî zivrîneve.
Gund mezin bûn
bûne bajar
bajar mezin bûn
bûne tenûr
Tenûr pîr bûn
Bûne kavil
Kavil bûne dîwanxane se û rûviyan
Xwezî gundo
Ne ez çi car mezin bibam
Ne tu bibaye bajê seyan
bûne kavil
kavil bûne dîwanxana se û rûviyan
Xwezî gundo
Ne ez çi car mezin bibam
ne tu bibaye bajarê seyan.
Parzînk li ber piyan
Hetav li esmana
Zirkêtk di kolanêt vî serî de
çiyayê çoxik pirî saçme
Li ber sîngê min.
Hemî şeva
di xewnêt kevn û bîrêt min da
hespek têtin .
hevsarê wî
kezî û biskêt dayika min in
ku hind ya çûy
şevê daqûrtand.
Goga gerdûn hildigrim wek hêkekê
didanime di nav paxla te de
ku hêlîna destêt min bû û siwar dibim
hemû dinya peya dibît
Ez ji vî hespî peya nabim Xwedê pîr bû
Ez jî pîr bûm
Xwîn pîr nebû.
Kaxezek hat qasidek îna
Me li gel qasidî çi gotin nekirin di kaxezê de nivîsîbû:
Dihî kuştin Hemî kuştin Pişt li me çemya
Wek wî qasidê me çi gotin
digel nekirin
û pişt lê çemya bû.