Bara det första kapitlet finns med här än.

Gutland hitti fyrsti maþr þan sum þieluar hit · þa war gutland so wluist at þet daghum sanc Oc natum war uppj · En þann maþr quam fyrsti eldi a land Oc siþan sanc þet aldri · þissi þieluar hafþi ann sun sum hit hafþi · En hafþa cuna hit huita stierna þaun tu bygþu fyrsti a gutlandi fyrstu nat sum þaun saman suafu þa droymdi hennj draumbr · So sum þrir ormar warin slungnir saman ·j· barmj hennar Oc þytti hennj sum þair scriþin yr barmi hennar · þinna draum segþi han firi hasþa bonda sinum hann riaþ dravm þinna so · Alt ir baugum bundit bo land al þitta warþa oc faum þria syni aiga · þaim gaf hann namn allum o fydum · guti al gutland aigha graipr al annar haita Oc gunfiaun þriþi · þair sciptu siþan gutlandi ·i· þria þriþiunga · So at graipr þann elzti laut norþasta þriþiung oc guti miþal þriþiung En gunfiaun þann yngsti laut sunnarsta Siþan af þissum þrim aucaþis fulc ·j· gutlandi so mikit um langan tima · at land elptj þaim ai alla fyþa · þa lutaþu þair bort af landi huert þriþia þiauþ so at alt sculdu þair aiga oc miþ sir bort hafa sum þair vfan iorþar attu · Siþan wildu þair nauþugir bort fara men foru innan þors borg Oc bygþus þar firir · siþan wildi ai land þaim þula vtan racu þaim bort þeþan · Siþan foru þair borth ·i· faroyna · Oc bygþus þar firir þar gatu þair ai sic vppi haldit Vtan foru ·j· aina oy wiþr aistland sum haitir dagaiþi · Oc bygþus þar firir Oc gierþu burg aina sum enn synis · þar gatu þair oc ai sic haldit · Vtan foru vpp at watnj þi sum haitir dyna Oc vpp ginum ryza land so fierri foru þair at þair quamu til griclanz · þar baddus þair byggias firir af grica kunungi · vm · ny · oc niþar kunungr þann lufaþi þaim Oc hugþi at ai miþ ann manaþr wari · siþan gangnum manaþi wildi hann þaim bort wisa En þair annzsuaraþv at ny oc niþar wari ·e· oc ·e· Oc quaþu so sir wara lufat · þissun þaira wiþratta quam firir drytningina vm siþir þa segþi han · Minn herra kunungur þu lufaþi þaim byggia vm ny · oc niþar · þa ir þet ·e· oc ·e· þa matt þu ai af þaim taka · So bygþus þair þar firir · oc enn byggia · oc enn hafa þair sumt af waru mali Firi þan tima oc lengi eptir siþan · Troþu menn a · hult · oc ·a · hauga · wi · oc · stafgarþa · oc a haiþin guþ · blotaþu þair synnum oc dydrum sinum Oc fileþi · miþ matj · oc mundgati · þet gierþu þair eptir wantro sinnj · land alt · hafþi sir hoystu blotan miþ fulki · ellar hafþi huer þriþiungr · sir · En smerri þing hafþu mindri blotan meþ fileþi · matj · Oc mungati · sum haita suþnautar · þi et þair suþu allir saman ·